04 Декабря, 2022 Воскресенье

Узышлі на "Тэлевяршыню"

  • 23 мая 2017 Общество Беларуская 0

    У трынаццаты раз у Палацы Рэспублікі ў Мінску 12 мая прайшла цырымонія ўзнагароджвання пераможцаў Нацыянальнага тэлевізійнага конкурсу “Тэлевяршыня”. Сярод фіналістаў быў і калектыў канала “Паставы-ТБ”.

    — На конкурс было пададзена 286 работ ад 33 вяшчальных арганізацый, — расказвала адказны выпускальнік дзяржаўнай установы “Рэдакцыя праграмы радыёвяшчання “Пастаўскае мясцовае радыё” і праграмы тэлебачання “Паставы-ТБ” Юлія Лазікевіч. — Традыцыйна за “тэлеўра­джай” змагаліся не толькі рэспубліканскія каналы, але і рэгіянальныя. У намінацыі “Лепшы праект рэгіянальнага тэлебачання” з намі канкурыравалі Магілёўскае і Лідскае тэлебачанне (першае і другое месца). Прыемна, што наш невялікі калектыў стаў у адзін рад з тэлеканаламі, у якіх колькасць работ­нікаў намнога большая. У нас — трэцяе месца. Яго атрымалі за фільм “Жыццё на пераадоленне”, які мы знялі да  Міжнароднага дня інвалідаў.

    Аўтар сцэнарыя і рэжысёр фільма — сама Юля, аператар — Сяргей Плешакоў, інжынер відэамантажу — Дзмітрый Ракоўскі. У падрыхтоўцы праекта прыняў удзел увесь калектыў тэлеканала. Героі — людзі, якія ў выніку няшчасных выпадкаў сталі фізічна абмежаванымі, але не страцілі надзеі і аптымізму. У мінулы чацвер, 18 мая, тэлеканал “Паставы-ТБ” запрасіў іх да сябе ў студыю. Віталій Душэўскі і Дзяніс Жук — пастаўчане,  Алеся Мялько і Віктар Муха прыехалі з Дунілавіцкага псіханеўралагічнага дома-інтэрната для састарэлых і інвалідаў.

    — Для нашага калектыву вельмі важна не толькі падзяліцца з вамі сваёй радасцю, — гаварыла падчас сустрэчы Юлія Лазікевіч, — але найперш па­дзякаваць вам за згоду на здымкі, за вашы мужнасць, імкненне да пераадолення, здавалася б, непераадольных цяжкасцей, бясконцую любоў да жыцця.

    Госці, атрымаўшы ў падарунак кветкі і цукеркі, у сваю чаргу дзякавалі за ўвагу да іх і нераўнадушша да іх няпростых лёсаў, шчыра радаваліся поспехам пастаўскіх тэлевізіёншчыкаў, гаварылі, што з нецярпеннем чакаюць выхаду кожнай перадачы.

    Яшчэ адзін герой фільма Андрус Чыпуліс па стане здароўя не змог прыехаць у студыю, таму Юлія Лазікевіч, карэспандэнт Наталля Налей і аператар Сяргей Плешакоў адправіліся да яго дадому. Атрымалася цёплая, шчырая размова з Андрусам і яго жонкай Алесяй.  

    — Словы падзякі, кветкі і цукеркі — гэта маленькая часцінка таго, чым мы можам аддзячыць гэтым цудоўным душой і моцным духам людзям, — гаварыла Ю. Лазікевіч. — Яны — прыклад мужнасці, міласэрнасці і дабрыні. Кожнаму здароваму чалавеку варта часцей задумвацца над сэнсам жыцця, яго каштоўнасцямі, вучыцца ў герояў фільма аптымізму.

    Тэкст і фота Анны АНІШКЕВІЧ. 

     

    Автор: Анна АнішкевічПастаўскі край

Комментарии (0)